نقوشِ ادب Nuqoosh-e-Adab

صوفی سلطانؔ شطاری کی شخصیت اور شاعری

اجمل محسن ایڈوکیٹ۔ ورنگل
نعتیہ مجموعہ کلام متاع نجات (۱۹۸۵ء) شعری مجموعہ خامہ ٔ فکر (۱۹۸۷ء) دوسرے نعتیہ مجموعہ سراجا منیراکے خالق جناب صوفی سلطان شطاری صاحب (عادل آبادی) ایک ہمہ جہتی شخصیت کے حامل نیک دل انسان ہیں۔ جہاں تک ذریعہ معاش کا تعلق ہے، گورنمنٹ کنٹراکٹر ہیں۔ ایک بہت ہی ہمدرد اور مخلص سماجی کارکن ہیں۔ آج کل ،تلنگانہ راشٹریہ سمیتی کے ریاسی سکریٹری کی حیثیت سے عوامی خدمت میں مصروف کار ہیں۔ غزل اور نعت کے عمدہ لہجہ کے شاعر ہیں۔
جناب سے چند ایک مشاعروں میں ملاقات کا شرف حاصل ہوا اور کلام سننے سنانے کا اتفاق ہوا۔ تفصیلی تعارف حاصل نہ ہوسکا۔ کلام پر بھی انہماک دے نہ سکا۔ لیکن جناب کی شخصیت میں ایک وضعداری کا احساس ضرور ہوا تھا۔ قربت اور رفاقت میں فاصلے حائل تھے۔
سال ۲۰۰۸ء میں جناب والا ، تلنگانہ راشٹریہ سمیتی کے ریاستی سکریٹری کی حیثیت سے ضلعی دورے پرورنگل تشریف لائے تو ، جناب اقبال شیدائی صاحب صدر تحریک قلم ورنگل نے مجھے فون پر بتایا کہ حیدرآباد مقیم عادل آباد کی ایک معروف شخصیت ، ہر دلعزیز سماجی کارکن، ٹی ۔ آر ۔ ایس کے ریاستی سکریٹری ، مشہور وممتاز شاعر جناب صوفی سلطان شطاری صاحب ورنگل تشریف لائے ہوئے ہیں۔ آپ تو انہیں جانتے بھی ہیں، میں نے فوراً کہا جانتا تو نہیں، پہچانتا ہوں شاید ۔ دوسری طرف سے اقبال شیدائی صاحب کی آواز آئی۔ ارے اچھی طرح جانتے ہو یارو ! تم نے حیدراباد میں ان کے ساتھ کئی مشاعرہ بھی پڑھے ہیں۔ تو ، ان کی آمد پر ایک خصوصی مشاعرہ منعقد کرنے کاارادہ ہے جس کی نظامت تم کر رہے ہو۔
صوفی سلطان شطاری صاحب اس مشاعرہ کے مہمان خصوصی تھے۔ اقبال شیدائی صاحب کے گھر پر سارے لوگ میرے منتظر تھے۔ صوفی سلطان شطاری صاحب نے جیسے ہی مجھے دیکھا ، فوراً کھڑے ہوگئے ، بہت ہی مخلصانہ انداز میں مصافحہ کیا۔ اقبال شیدائی صاحب نے میرا تعارف کروانا چاہا تو سلطان صاحب نے بڑے خلوص کے ساتھ کہا۔ ارے کیا بات کررہے ہیں آپ ، محسنؔ صاحب سے کون واقف نہیں ہے۔ موصوف کی یاد داشت اور پر خلوص انداز نے مجھے بہت متاثر کیا۔
موصوف کے تعلق سے میرے پاس سنا سنایا ہوا مواد ہی تھا۔ لیکن جس انداز سے میں نے موصوف کا تعارف پیش کیا وہ اتفاقا ان کے تینوں مجموعوں میں شامل تعارف کے عین مطابقت میں تھا، جس سے جناب صوفی سلطان شطاری صاحب بہتر متاثر ہوئے( میرا خیال ہے وہ سوچ میں پڑ گئے ہوں گے کہ ان کے تعلق سے اتنے معلومات مجھے حاصل کہاں سے ہوئے) مشاعرہ کے بعد بھی ہمارے درمیان گفت وشنید رہی، صوفی سلطان شطاری صاحب، میرے چچا جان جناب شیخ اسماعیل صابرؔ صاحب (مغلپورہ ، حیدرآباد) کے بہت ہی قریبی اور عزیزی نکل آئے جن سے ان کی رفاقت قریب چالیس سال کی ہے۔ مجھے بھی یاد آیا کہ میں نے دو ایک نعتیہ مشاعرہ ان کے ساتھ اپنے چاچا جان جناب شیخ اسماعیل صابرؔ کے گھر پر ہی پڑھے ہیں۔ جو کہ ہر سال استقبال رمضان کے سلسلے میں ،حیدرآباد کے بزرگ ، مشہور ومعروف ، مخدوم محی الدین ایوارڈ یافتہ شاعر جناب خواجہ شوق صاحب کی صدارت میں منعقد کیا کرتے ہیں۔ بہرحال صوفی سلطان شطاری صاحب کے ساتھ مختلف امور پر بہت ساری باتیں ہوئیں۔
اتفاق سے اس مشاعرہ کے دو دن بعد ہی ، شہر ورنگل کی ایک معروف ادبی شخصیت ، حال مقیم ٹولی چوکی حیدرآباد، نامور شاعر وادیب ڈاکٹر مسعود جعفری کی ورنگل آمد ہوئی جو کہ انجمن ترقی اردو ورنگل کے صدر ، ڈاکٹر بہادر علی سابق پرنسپل اسلامیہ ڈگری الج ورنگل کی جانب سے ، پروفیسر اقبال علی صاحب کے شاتاواہانہ یونیورسٹی کے وائس چانسلر کے عہدہ پر فائز ہونے کے سلسلے میں ایک تہنیتی پروگرام اور مشاعرہ دفتر انجمن ترقی اردو صوبہ داری میں منعقد ہو رہا تھا۔ نظامت کے فرائض مجھے سونپے گئے تھے۔ صوفی سلطان شطاری صاحب اس مشاعرہ میں بھی بحیثیت مہمان خصوصی مدعو تھے۔ صوفی سلطان شطاری صاحب نے مشاعرہ گاہ میں داخل ہوتے ہی سب سے پہلے مصافحہ کرتے ہوئے مجھ سے کہا ، محسن صاحب یقین کیجئے کہ آپ کا خلوص ہی مجھے یہاں کھینچ لایا ہے۔ ورنہ مجھے ایک سیاسی دورے پر نکلنا بہت ضروری تھا  میں نے کہا ذرہ نوازی کا بہت بہت شکریہ لیکن میں تو یہاں محض ایک اتفاق سے حاضر ہوں۔ انہوں نے فورا  کہا ارے واہ ! آپ اورآپ کی نظامت کے بغیر بھلا کوئی مشاعرہ منعقد ہو بھی سکتا ہے۔ ؟ ۔ پھر انہوں نے مجھے اپنے نعتیہ مجموعہ سراجا منیرا کی سوغات پیش کی۔ بعد تلاوت آیات قرآنی صوفی سلطان شطاری صاحب کے نعتیہ کلام سے کارروائی کا آغاز ہوا۔ جناب نے خوب خوب داد لوٹی۔
اس کے بعد جناب سے میری ملاقاتیں حیدرآباد کے مشاعروں میں ہوتی رہیں، جناب انجم شافعیؔ اور جناب یوسف روش صاحب سے میری بے تکلفی ہے اور یہ دونوں صوفی سلطان شطاری صاحب سے بہت پر تکلف ہیں۔ یہ دونوں حضرات ٹی ۔ آر ۔ ایس میناریٹیز دفتر، اعظم پورہ حیدرآباد میں خدمات انجام دے رہے ہیں، ایک مرتبہ جب میں ان سے ملنے اعظم پورہ کے ٹی ۔ آر ۔ ایس کے دفتر گیا تو سلطان صاحب سے ملاقات ہوگئی۔ وہ عادل آباد کے دورہ پر نکلنے کے لئے تیار تھے۔ مجھے دیکھا تو مزاج پرسی کی، وجہ حاضری دریافت کی تو یوسف روشؔ صاحب نے کہا  مجھ سے ملنے آئے ہیں ۔ انہوں نے فورا کہا ، یوسف روشؔ صاحب ! یہ ہمارے بھی محسن ہیں  انجم شافعی صاحب کے آتے ہی وہ دورے پر نکل پڑے۔
کچھ دن بعد مجھے، انجم شافعی صاحب کے ذریعہ یوسف روشؔ صاحب کی تحریر ملی، جس میں جو خواہش تھی وہی خواہش انجم شافعی صاحب نے بھی بالمشافہ میرے سامنے رکھی ۔ سلطان شطاری صاحب کے دو مجموعہ کلام میرے حوالے کرتے ہوئے کہا کہ سلطان بھائی کی خواہش ہے کہ آپ انہیں تفصیلی پڑھیں، اور سلطان بھائی کے پچاس سالہ جشن شاعری کے سونیر کے لئے تحریری اظہار خیال بھی کریں ، اور یہ بھی کہا کہ سلطان بھائی آپ سے خود بھی اس سلسلے میں بات کریں گے۔ جبکہ ان دونوں سے پہلے ہی سلطان صاحب نے ذریعہ فون اسکااظہار کردیا تھا۔ میں جہاں ان کے اس خلوص واعتماد کا قائل ہوا کہ مجھے اس قابل سمجھا، وہیں اس مخمصے میں پڑ گیا کہ میں کہ جو اچھی شاعری کے مزے ہی لے سکتا ہوں ، محظوظ ہوسکتا ہوں، کلام پر اظہار خیال کی صلاحیت کہاں سے پیدا کروں۔ ان تینوں حضرات کے اعتماد کو کیسے قائم رکھوں۔؟ اخلاقی فریضہ اندر سے دل کو کچوکے دینا شروع کردیا۔ کچھ تو ان کے خلوص کا پاس رکھ محسن ؔ ، کچھ تو حقِ دوستی ادا کرنے کی سعی کر محسن ؔ، خود کو تبصرہ کا اہل نہیںسمجھتا تو کم سے کم اتنا تو ثبوت دے کہ تو نے کلام پورے انہماک سے پڑھا ہے ، اور پڑھا ہے تو کیا سمجھا ہے۔
پھر میں نے صوفی سلطانؔ شطاری صاحب کے دونوں مجموعہ خامہ ٔ فکر  اور سراجا منیرا پورے انہماک سے پڑھے۔ کسی بھی شاعر کی تخلیقات چاہے کتنی ہی اصناف ِشاعری میں ہوں، پڑھ کر قطعی محسوس نہیں ہوتا کہ ، ایک شاعر میں کئی کئی انسان بستے ہیں۔ ہر صنف میں ایک ہی شاعر اور ایک ہی انسان نظر آتا ہے۔ لیکن مجھے صوفی سلطانؔ شطاری صاحب کی شاعری میں دو مختلف انسان ملے، بیک وقت نہیں بلکہ ایک دور کے فصل سے ۔
صوفی سلطان شطاری صاحب کے متاعِ نجات کے دور کا تو مجھے علم نہیں ہے ، لیکن ان کے دور خامہ فکر میں میری ملاقات ایک جوان خیال ، رومانی مزاج وماحول کے ، فصیح وبلیغ ، روایتی طرز کے شاعر سے ہوئی تو سراجا منیرا میں میری ملاقات ، واحدانیت کے قائل ، سچے عاشق ِرسول ؐ ، اسلام دوست ، روحانی خیالات وعقیدت سے معمور ، پابند انسان سے ہوئی ، خیالات کا اظہار بیشتر ، اساتذہ کی زمینوں میں ہے ، جو کہ ایک ہمت مردانہ والی بات ہے کہ عمدہ سے عمدہ مضامین ، اساتذہ نے جب نظم کردیئے ہوں تو طبع آزمائی کے لئے بچ کیا جاتا ہے۔ لیکن صوفی سلطان شطاری صاحب نے بڑی ہمت دکھائی ، عہد استاذہ کی شعر گوئی کے جو جو لوازمات موضوعات ہیں، ان پر بڑی محنت کیساتھ مضامین بندھے اور شعر موزوں کرتے ہوئے اساتذہ کے اسلوب کی پاسداری رکھی ہے۔ غزل میں اظہار خیال غزل کے حقیقی آہنگ میں ہے۔
شعری مجموعہ خامہ فکر میں اگرچہ کہ چند ایک نظمیں بھی شامل ہیں لیکن یہ کتاب دراصل مجموعہ غزلیات ہی ہے، جس میں جملہ ایک سو اکیس غزلیات شامل ہیں اور ہر غزل اپنے عروج پر اور ہر شعر بولتا شعر ہے۔ زبان وبیان میں فصاحت ہے ، خیالات کی عمدگی ہے تازگی ہے شگفتگی ہے، عشق میں ایک ایک لمحہ حائل مرحلے پراظہار خیال ہے۔ حسن ، عشق ، بے وفائی، فرحت، تڑپ ، کسک ، یاد ، انتظار ، بہار وخزاں ، دل ، دردِ دل ، آنکھ ، نظر ، نگاہ ، برق وآشیاں ، گیسو ، لب ، ورخسار ، غرض کے غزل کے ہر ہر موضوع پر اشعار شامل ہیں۔ ہر شعر سنبھل کر کہا ہے ۔ شاعر کے تعارف کے بغیر کلام پڑھا جائے تو لگے کہ عہد اساتذہ کے دور کے کسی شاعر کا کلام زیر مطالعہ ہے۔
اپنے خیالات کے ثبوت میں خامہ فکر میں شامل غزلوں کے مختلف لوازمات وموضوعات پر موزوں اپنی پسند کے چند اشعار بطور حوالہ اور تعارف یہاں رقم کرنا مناسب سمجھتا ہوں۔ ملاحظہ ہوں۔
عشق سے متعلق چند اشعار :

کیا وہ سمجھیں گے عشق کو سلطاںؔ
جن کو دردِ جگر نہیں ہوتا
٭
کسی صورت سے انکی بزم میں جاونگا میں سلطاںؔ
پھر اس کے بعد جو بھی فیصلہ ہو میری قسمت کا
٭
دیکھو جو مٹ گئے ہیں گذرگاہِ عشق میں
واللہ ان کی موت ، حیاتِ دوام ہے
ان کا خیال ان کی تمنا ہے ان کی یاد
کیا کیا ہے ساتھ زاد ِسفر ہم سے پوچھئے
٭
دل اور درد سے متعلق اشعار:
دمِ گفتار رہا ضبطِ تکلم حائل
دردِ دل نے تو بہت اس کو پکارا ائے دوست
٭
ذرا دردِ دل بیتا کی لینا خبر آکر
مٹادے نہ کہیں سلطانؔ یہ آہ وفغاں مجھ کو
٭
پھر ترا غم دلِ مضطر تلاش کرتا ہے
جو تو نے چھوڑا ہے وہ گھر تلاش کرتا ہے

آنکھ ، نظر ، نگاہ، اور آنسو سے متعلق:

چشمِ بینا ہے تو آؤ اور دیکھو شوق سے
خود مصور جلوہ گر ہے پردئہ تصویر پر
٭
لب تھے خاموش مگر بول رہی تھیں نظریں
بزمِ جاناں میں عجب ہم نے تماشہ دیکھا
٭
موجِ الم کی زد میں ہے مرا سفینۂ حیات
جانے کدھر ہے آج کل تیری نگاہِ التفات
٭
نہیں تھمتے مرے آنسو نہیں تھمتے مرے آنسو
کہ بہنا کیا ہے ان کا ،حالِ دل کی ترجمانی ہے
٭

بہار اور خزاں سے متعلق اشعار :

آمد فصلِ بہاراں نے دکھایا ہے رنگ عجب
پھول ہیں سب دامنوں میں پھول شاخوں پر نہیں
٭
سلطاںؔ منائیں جشنِ بہاراں ہم کس لئے
جب بھی بہار آئی گرفتار ہوگئے
٭
ذرّہ ذرّہ پہ ہو خوفِ خزاں کا پہرا
پھول پر فصل بہاراں کا اثر کیا ہوگا
٭
مرے ہمدم بہارِ نو مجھے راس آنہیںسکتی
قفس میں نکہتِ گل آرہی ہے دردِ سر ہو کر
٭

برق وآشیاں سے متعلق :

نشیمن کو کیا روشن جو میں نے شعلۂ دل سے
فلک پربجلیاں سب رہ گئیں زیر وزبر ہوکر
٭
کیوں لینے لگی بجلی انگڑائی پہ انگڑائی

کہا میرے گلستاں میں پھر فصلِ بہار آئی
٭
اے برق اندھیرا ہے نشیمن میں ابھی تک
تقدیر نشیمن کی کسی طرح جگادے
٭
پھر ایک نیا آشیاں گلشن میں بنا کر
میں سوئے فلک برق وشرر دیکھ رہا ہوں

فرقت اور دردِ تنہائی سے متعلق :

یونہی رہے جو اپنے دلِ ناتواں کارنگ
فرقت میں ان کے صدمے اٹھائیں گے کس طرح
٭
بے وفا ہم پہ کیا گذری ہے تجھے کیا معلوم
درد کی رات جو کاٹی تو سویرا دیکھا
٭
کبھی دردِ فرقت نہ اٹھا تھا ایسا ، کبھی حال اپنا ہوا تھا نہ ایسا
سر ِشام ہی سے یہ ہوتا ہے محسوس ، مری زندگی کی یہ شام آخری ہے
٭
وہاں یاد کرتے تھے سلطانؔ کو وہ
گھٹا دم یہاں ہچکیاں آتے آتے
٭

انتظار کے موضوع پر:

صدا پہ کان ، نظر در پہ اور دل بے چین
وفورِ شوق میں یوں انتظار ہم نے کیا
٭
خدا ہی جانے وہ آئیں گے یا نہیں سلطاںؔ
ہم کب سے راہ میں آنکھیں بچھائے بیٹھے ہیں
٭
آپ کو سلطاںؔ اجل کا کس لئے انتظار
خود چھلک جاتا ہے پیمانہ یہ بھر جانے کے بعد
٭

اب انتظار کی لذت ہے بس حیات اپنی

تمام عمر ترا دوست انتظار چلے
صوفی سلطان شطاری صاحب نے اپنا شعری مجموعہ اس دور میں ترتیب دیا ہے جبکہ غزل کے مزاج میںکافی تبدیلیاں آچکی تھیں۔ حسن وعشق ، لب ورخسار کا ذکر بہت کم اور حالات حاضرہ کے مشاہدات پر مشتمل مضامین نے جگہ لے لی تھی، لیکن ایسے دور میں بھی سلطان شطاری صاحب نے ناموس صنف ِغزل پر آنچ آنے نہ دیا ۔ غزل کی روایت کے ساتھ انصاف سے کام لیا۔ تمام مضامین حسن وعشق کا طواف کرتے نظر آتے ہیں۔ الفاظ کی موزونیت وانتخاب ، مصرعوں کا ارتباط منصفانہ ہے اور غزل کے حسن میں اضافہ کرتا ہے۔ موصوف جن اساتذہ سے متاثر ہے ان کا رنگ کلام میں جھلکتا ہے۔ کہیں کہیں تو جناب اپنے کلام کے بے مثال ہونے کا دعوی کرتے نظر آتے ہیں، جیسا کہ ان اشعار سے واضح ہے۔
جب بھی سلطاں غزل سناتے ہیں
داد لیتے ہیں اہلِ محفل سے
٭
جمادیا وہاں شعر وسخن کا رنگ سلطاںؔ
غزل کو اپنی جہاں بھی سنادیا تونے
٭
توجہ دیں ذرا ارباب ِعلم وفن سلطاںؔ
سنا رہا ہو غزل میرؔ سے زباں لیکر
٭
کلام سن کے یہ کہتے ہیں اہل فن سلطاںؔ
جہاں میں ایسا تو جادو بیاں نہیں ملتا
کہیں کہیں اس احساس کے شکار بھی دکھائی دیتے ہیں کہ منہ سے کوئی بڑی بات تو نکل نہ گئی ہو، کیونکہ غزل گوئی میں معراج فن یا مکمل دسترس کا دعوی ، کوئی آسان یا معمولی بات تو نہیں ، اور خود ہی یہ کہتے ہیں کہ :
تو ناز کر نہ کبھی اپنے فن پہ ائے سلطاںؔ
جہان شعر پہ کب کس کا اختیار چلے
٭
کیا بات ہے کہ اب کوئی ہوتی نہیں غزل
سلطاںؔ تمہیں کمالِ سخن پہ غرور تھا
٭
ناقدریٔ دنیا سے نہ گھبرا کبھی سلطاںؔ
وقت آئے گا جب قدرِ ہنر ہو کے رہیگی
صوفی سلطان شطاری صاحب کی غزلوں میں کچھ ایسے اشعار بھی ارادتاً ہو کہ غیر ارادی طور پر شامل ہوگئے ہیں، جو اس بات کی غمازی کرتے ہیں کہ بہت جلد جناب کا ذوق سخن ایک نئی موڑ لینے والا ہے اور ایک ایسا سفر ہے جو انہیں منزل حقیقی کی راہ پر گامزن کرنے والا ہے۔ اور اس راہ میں وہ فکر کے ایسے چراغ روشن کریں گے جو نہ صرف انہیں بلکہ پوری قوم کو روشنی دکھاتے رہیں گے۔ منزل حقیقی کی طرف رہنمائی کرتے رہیں گے ، وہ چند قیمتی اشعار بھی برائے ملاحظہ پیش ہیں :

کر فکر عاقبت کی دو روزہ زندگی ہے
یہ ہے جہانِ فانی ، کس کی یہاں بنی ہے
٭
سلطانؔ بندگی تو بڑی بات ہے مگر
ایک سجدہ شکر کابھی نہ تم سے ادا ہوا
دارِ منصور ہو یا طُور یا نارِ نمرود
ہر طرف آپ کی الفت کے فسانے دیکھے
٭
ہے تو ہی اول وآخر ہے تو ہی ظاہر وباطن
کوئی عنوان ہے میرا نہ کوئی داستاں میری
٭
آپ دنیا سے سفر کرتے ہیں لیکن سلطاںؔ
ساتھ کچھ بھی نہیں سامان بڑی مشکل ہے
٭
کچھ خبر بھی ہے تجھے زاہد کہ بندگی کیا ہے
ہو دل میں نور تو چہرے پہ نور ہوتا ہے

خامہ فکر  کے بعد بیس سال تک ، صوفی سلطان شطاری صاحب کا پھر کوئی شعری مجموعہ منظر عام پر نہیں آیا۔ شاید راہ ِحق کی تاش میں غلطاں اور فکر صحیح کے سمندر میں مستغرق رہے ہوں، اسی لئے بیس سال کے طویل عرصہ کے بعد ان کا کوئی شعری مجموعہ منظر عام پر آیا تو سراجا منیرا کی صورت میں آیا جس میں ، خالق کائنات سے ارجاع ، وسپردگی سے متعلق حمدیہ کلام ، حب نبیؐ سے متعلق عشق ِرسول میں ڈوبا ہوا نعتیہ کلام ، صحابہ کرام وشہدائے کربلا پر تقدیس سے بھر پور سلام، بزرگان دین میں گرفتار عقیدت سے بھری منقبتیں ، اور نعتیہ قطعات شامل ہیں۔
حمد باری تعالیٰ ، نعتؐ ِرسول پاک اور بزرگان ِدین پر منقبتیں وہ لکھتا ہے، جس کو توفیق ہوتی ہے ، شاعری کے ان متبرک اصناف میں جو جتنا ڈوب کر کہتا ہے ، اتنی ہی توفیق سے نوازا جاتا ہے۔ اتنا ہی قربِ الہی ، قربِ محمدیؐ ، قربِ بزرگان دین سے مستفیض ہوتا ہے۔ ان اصناف میں شاعر خود نہیں کہتا ، بلکہ کہلوایا جاتا ہے۔ اور جو کہلوایا گیا ہے اس کے متعلق بھلا کوئی کہے تو کیا کہے۔ حمد اور نعت کا تو ہر شعر ہی لاجواب ہوتا ہے۔ ذکر الہی اور ذکر نبیؐ ہی تو اشعار میں ہوتا ہے ، اسی لئے تو حمد ونعت کا لکھنا ، سننا اور سنانا بھی ثواب عظیم ہے۔ اتنا ضرور ہے کہ اس میدان میں بہت احتیاط کی ضرورت ہوتی ہے۔ صوفی سلطان شطاری صاحب کے نعتیہ مجموعہ سراجا منیرا سے ، یاد الہی،عشق ِرسول، اور بزرگانِ دین سے محبت پر ، چند ، رغبت اور عقیدت پیدا کرنے والے اشعار یہاں رقم کرنا چاہوں گا ، تا کہ قارئین میں سراجا منیرا کو شروع سے آخر تک پڑھنے کا اشتیاق جاگے۔
حمدیہ اشعار :

تو ہے کرم نواز تیرے بس میں کیا نہیں
تیرے سوا کریم کوئی دوسرا نہیں
٭
رحم فرما ہم پہ ربِّ ذوالجلال

جز ترے کس سے کہیں ہم اپنا حال
٭
تو پاس ہو کے دور ہے یہ اور بات ہے
ارض وسما میں کون تجھے جانتا نہیں
٭
ذات تری لا شریک اورپاک ہے
تجھ کو سمجھے کس کو یہ ادراک ہے

نعتیہ اشعار :

قرطاسِ دل میں وذہن پر نام آپ کا لکھ کر
روشن ہیں مرے فکر وقلم شاہؐ مدینہ
٭
ہیں دل شفاف آئینے تو چہرے آفتابی ہیں
محمدؐ کے غلاموں کی یہی پہچان ہے دیکھو
٭
ہے جذب اس میں محمدؐ کا پسینہ
شجر توحید کا اب تک ہرا ہے
٭
رات کی تنہائیوں میں ذکر کی خوشبو لئے
آپ پر ہر ایک لمحہ زندگی قربان ہے
٭
منسوب ہم ہوئے ہیں جب سے درِ نبیؐ سے
اکتا گئی ہیں آنکھیں دنیا کی روشنی سے
٭
آواز دے کے دیکھ کبھی احترام سے
بنتے ہیں بگڑے کام محمدؐ کے نام سے
شہدائے کربلا سے متعلق چند شعر:
یہ رو کر کہہ رہی تھی شام کو جاتے ہوئے زینبؓ
ذرا نانا مرا حالِ پریشاں دیکھتے جاؤ
٭
عظمت عیاں ہے سبطِ نبیؐ تیرے نام سے
تعریف کیا ہو تیری اس ادنیٰ غلام سے 

منقبتی اشعار :

علیؓ مشکل کشا کا نام صبح شام لینا ہے
کہ ہم کو ساقی ٔکوثر سے اپنا جام لینا ہے
٭
حسینؓ عالم امکاں میں جاودانی ہے
زمیں کی گود میں تنویر آسمانی ہے
٭
درِ غوث الوریٰؓ پر سر جھکاکر دیکھتے جاؤ
یہاں بن جاتے ہیں بگڑے مقدر دیکھتے جاؤ
٭
سلاطینِ جہاں اس جا ادب سے سر جھکائے ہیں
یہ ہے، وہ درِ فقیرانہ نہ معین الدین چشتیؒ کا
٭
آپؒ کی جس پر نظر ہو خواجۂ بندہ نوازؒ
پھر وہ کیسے در بدر ہو خواجہ بندہ نواز
٭
چھاگئے دل پہ نگاہوں میں سمائے فیاضؒ
کھو کے ہم اپنی خودی آپؒ کو پائے فیاضؒ

صوفی سلطان شطاری صاحب نہ صرف ایک بہت اچھے شاعر ، بلکہ ایک اچھے ملّی ، سماجی، اور سیاسی خادم کی حیثیت سے بھی مقبول عام شخصیت ہیں، میں دعا گو ہوں کہ اللہ تعالیٰ ان کے دین کی خدمت کے جذبہ کو اور تقویت عطا فرمائے۔آمین